రోడ్డు ప్రమాదంలో మత్స్యకారుడి దుర్మరణం

రోడ్డు ప్రమాదంలో మత్స్యకారుడి దుర్మరణం

ప్రజా దీవెన/సంగారెడ్డి : సంగారెడ్డి జిల్లా హత్నూర గ్రామానికి చెందిన గుడాల భానుచంచర్ అనే మత్స్యకారుడు రోడ్డు ప్రమాదం లో దుర్మరణం పాలయ్యారు. చేపల వేటకు వెళ్తూ ప్రమాదవశాత్తు ట్రాక్టర్ కింద పడిన మత్స్యకారుడు భానుచందర్ మృతి చెందిన ఘటన హత్నూర శివారులో శనివారం చోటుచేసుకుంది. పోలీసులు తెలిపిన వివరాల ప్రకారం హత్నూర గ్రామానికి చెందిన గుడాల భానుచంచర్ (37) శనివారం గ్రామ శివారులోని నడిమి చెరువు సమీపంలో గల తన పొలానికి పయనమై అక్కడే పొలం దగ్గర ఉన్న తన భార్యకు చేరువులో చేపలు పట్టుకొస్తానని చెప్పి తన ట్రాక్టర్ పై వెళ్లాడు.

ట్రాక్టర్ చెరువు వద్దకు రాగానే బోల్తా పడి భానుచందర్ తలకు తీవ్రగాయలై అక్కడికక్కడే మృతి చెందాడు. మృతుడికి భార్య మహేశ్వరి, ఇద్దరు కుమారులు, ఒక కూతురు ఉన్నారు. మృతుడి భార్య మహేశ్వరి ఫిర్యాదు మేరకు కేసు నమోదు చేసుకుని మృతదేహాన్ని పోస్టుమార్టం నిమిత్తం నర్సాపూర్ ప్రభుత్వ ఆసుపత్రికి తరలించినట్లు ఎస్సై లక్ష్మారెడ్డి తెలిపారు.