Secretary Nari Ilaiah : ప్రజాదీవెన నల్గొండ : భవన నిర్మాణ కార్మిక అడ్డాలలో ఉపాధి కోసం గ్రామాల నుండి పట్టణాలకు వలస వస్తున్న మహిళా కార్మికులకు ప్రభుత్వం ఉపాధి అవకాశాలు కల్పించాలని తెలంగాణ వ్యవసాయ కార్మిక సంఘం జిల్లా కార్యదర్శి నారి ఐలయ్య, మహిళా కూలీల జిల్లా కన్వీనర్ దండెంపల్లి సరోజ ప్రభుత్వాన్ని డిమాండ్ చేశారు.
బుధవారం తెలంగాణ వ్యవసాయ కార్మిక సంఘం రాష్ట్ర కమిటీ పిలుపుమేరకు నలగొండ పట్టణంలోని అంబేద్కర్ విగ్రహం దగ్గర భవన నిర్మాణ కార్మికుల అడ్డాలో గ్రామీణ ప్రాంతాల నుండి వస్తువు ఉన్న మహిళా కార్మికుల సమస్యలపై సర్వే చేయడం జరిగింది. ఈ సందర్భంగా వారు మాట్లాడుతూ గ్రామీణ ప్రాంతంలో వ్యవసాయం యాంత్రికరణ పెరిగిన తర్వాత ఉపాధి లేక పట్టణాలకు భవన నిర్మాణ పనుల కోసం వలస వస్తున్నారని వారికి పనికి తగిన వేతనం అందడం లేదని పని ప్రదేశాలలో లైంగిక వేధింపులకు గురవుతున్నారని ఆవేదన వ్యక్తం చేశారు. నెలలో 15 రోజులకు మించి పని దొరకడం లేదని ఉపాధి అవకాశాల కోసం ప్రభుత్వం భవన నిర్మాణ కార్మికుల సంక్షేమ బోర్డు ద్వారా పేర్లు నమోదు చేసుకొని పని కల్పించాలని డిమాండ్ చేశారు.
నిర్మాణ కార్మికుల అడ్డాప్రదేశాలలో మహిళలకు మౌలిక సదుపాయాలు బాత్రూం లు షెడ్లు ఏర్పాటు చేయాలని, ఇండ్లు లేని నిరుపేద నిర్మాణ కార్మికులకు ప్రభుత్వం భూమి కొనుగోలు చేసి 120 గజాల స్థలం ఇచ్చి కేంద్రం 10 లక్షలు ఐదు లక్షలు ఇంటి నిర్మాణానికి ఆర్థిక సహకారం అందించాలని డిమాండ్ చేశారు. పురుషులతో సమానంగా మహిళలు పనిచేస్తున్న ఇచ్చే కూలిలో వ్యత్యాసం ఉంటుందని సమాన పనికి సమాన వేతనం అమలు చేయాలని డిమాండ్ చేశారు. ఈ కార్యక్రమంలో తెలంగాణ వ్యవసాయ కార్మిక సంఘం జిల్లా సహాయ కార్యదర్శి మన్యం బిక్షం, పట్టణ అధ్యక్షులు రుద్రాక్ష యాదయ్య, మహిళా కూలీల సంఘం నాయకురాలు అన్న భీమోజు పద్మ, అడ్డా కూలీలు యాదమ్మ, రాములమ్మ, వెంకటమ్మ, మంజుల, తదితరులు పాల్గొన్నారు.