— కొత్త ప్రభుత్వం ఏర్పడి 19 నెలలు గడిచిన కొనసాగుతున్న సమస్యలు
–సిపిఎస్ ను వెంటనే రద్దు చేయాలి
–లేదంటే ఆగస్టు 23 న హైదరాబాద్ లో రాష్ట్రస్థాయి మహా ధర్నా
–యుటిఎఫ్ రాష్ట్ర కార్యదర్శి రాజశేఖర్ రెడ్డి
Rajasekhar Reddy TS UTF : ప్రజాదీవెన నల్గొండ : కొత్త రాష్ట్ర ఏర్పడి 11 ఏళ్ళు గడిచిన ప్రభుత్వ విద్యా రంగ పరిస్థితి ఇంకా మెరుగు పడకపోవడం శోచనీయం. కొత్త ప్రభుత్వం ఏర్పడి 19 నెలలు గడిచినప్పటికీ దీర్ఘకాలంగా పరిష్కారం కానీ అనేక సమస్యలు అలాగే ఉన్నాయని టీఎస్ యుటిఎఫ్ రాష్ట్ర కార్యదర్శి ఎం. రాజశేఖర్ రెడ్డి ఆరోపించారు. ఉపాధ్యాయ సమస్యలు పరిష్కరించాలని మంగళవారం
యుఎస్పిసి ఆధ్వర్యంలో బక్క శ్రీనివాస చారి, కె.రత్నయ్య, బి. వెంకటేశం అధ్యక్ష వర్గం గా జిల్లా కలెక్టరేట్ ఎదుట ధర్నా నిర్వహించారు. ఈ కార్యక్రమానికి ఆయన ముఖ్య అతిథిగా హాజరై మాట్లాడారు. ఉద్యోగుల బిల్లులు అనేకం పెండింగ్లో ఉన్నాయి. ప్రభుత్వ పాఠశాలలో మౌలిక వసతులు కల్పించకుండా కొత్త, కొత్త పేర్లుతో నూతన పాఠశాలను ప్రారంభించడం, ఎక్కువమంది చదివే విద్యార్థులు ఉన్న పాఠశాలల పట్ల తక్కువ నిధులు ఖర్చు చేస్తూ తక్కువ విద్యార్థులు ఉన్నచోట ఎక్కువ ఖర్చు చేయాలని ప్రభుత్వం ఆలోచనలు చేస్తూ, మరోవైపు విద్యలో కార్పొరేట్ శక్తులను నియంత్రించకుండా సామాజిక అంతరాలను పెంచి పోషిస్తున్నదని మండిపడ్డారు.
ప్రభుత్వ పాఠశాలలో నాణ్యమైన విద్యను అందిస్తామని భరోసా ప్రజలకు కల్పించలేక పోతున్నారని ఆయన ప్రభుత్వాన్ని విమర్శించారు. కాంగ్రెస్ మేనిఫెస్టో హామీ మేరకు వెంటనే సిపిఎస్ ను రద్దు చేయాలని ప్రభుత్వాన్ని డిమాండ్ చేశారు. ప్రభుత్వ స్పందించకపోతే ఆగస్టు 23 న హైదరాబాద్ లో రాష్ట్రస్థాయి మహా ధర్నా నిర్వహిస్తామని ప్రభుత్వాన్ని హెచ్చరించారు. అనంతరం యుఎస్పిసి నాయకులు జిల్లా కలెక్టర్ కు వినతి పత్రం అందజేశారు.
—ప్రధాన డిమాండ్లు ఇవే….
అన్ని క్యాడర్ల బదిలీలు షెడ్యూల్ ని తక్షణమే విడుదల చేయాలి. జీవో నెంబర్ 25 ను సవరించాలి. ప్రతి పాఠశాలలో కనీసం ఇద్దరు ఉపాధ్యాయులు ఉండాలి. 40 మంది విద్యార్థులు ఉన్న ప్రాథమిక పాఠశాలలో తరగతికి ఒక టీచర్ ఉండాలి. ఉన్నత పాఠశాలలో సబ్జెక్టు వర్క్ లోడ్ కు అనుగుణంగా టీచర్ పోస్టులు కేటాయించాలి.అన్ని రకాల పెండింగ్ బిల్లులను వెంటనే విడుదల చేయాలి.
రిటైర్డ్ అయిన ఉపాధ్యాయుల పెన్షనరీ బెనిఫిట్స్ విడుదల చేయాలి.
కేంద్ర ప్రభుత్వం మెమో నెంబర్ 57/05/2021/D&PW.(B) ప్రకారం 2003 డీఎస్సీ ఉపాధ్యాయులకు పాత పెన్షన్ ఆప్షన్ ఇవ్వాలి.సిపిఎస్ రద్దుచేసి ఓపీఎస్ ను పునరుద్ధరించాలి.స్కూల్ ఎడ్యుకేషన్ డిపార్ట్మెంట్ కు ఏకీకృత సర్వీస్ నిబంధనలు రూపొందించి డిఇఓ, డిప్యూటీ డిఈఓ, ఎంఈఓ, డైట్, బీఈడీ కళాశాలల అధ్యాపకుల ఖాళీలలో శాశ్వత నియామకాలు చేపట్టాలి.
నూతన జిల్లాలకు డీఈవో పోస్టులు ప్రతి రెవిన్యూ డివిజన్ కు డిప్యూటీ ఈవో పోస్టులు నూతన మండలాలకు ఎంఈఓ పోస్టులను మంజూరు చేయాలి.5571 పిఎస్ హెచ్ఎం పోస్టులు మంజూరు చేయాలి.
బిఈడి, డిఈడి అర్హతలు ఉన్న ఎస్జీటీ లందరికీ సీనియార్టీ ప్రకారం పిఎస్ హెచ్ఎం ప్రమోషన్ అవకాశం కల్పించాలి.అప్గ్రేడేషన్ ప్రక్రియ పూర్తయినందున జీవో 2, 3, 9, 10 లను రద్దుచేసి జీవో 11,12 ల ప్రకారం ఎస్ జి టి/ఎల్ పి/పి.ఈ టి లకు కామన్ సీనియార్టీ ప్రకారం పదోన్నతులు కల్పించాలి. సమగ్ర శిక్ష ఉద్యోగుల సమ్మె కాలపు జీతాన్ని వెంటనే చెల్లించాలి. కేజీబీవీ, యుఆర్ఎస్, సమగ్ర శిక్ష కాంట్రాక్టు ఉద్యోగులకు మినిమం బేసిక్ పే అమలు చేయాలి. మోడల్ స్కూల్స్, గురుకుల సిబ్బందికి 010 పద్దు ద్వారా వేతనాలు చెల్లించాలి
మోడల్ స్కూల్స్, గురుకుల, ఎయిడెడ్ టీచర్లకు హెల్త్ కార్డులు ఇవ్వాలి. పిఆర్సి నివేదికను వెంటనే తెప్పించుకొని 1 జూలై 2023 నుండి అమలు చేయాలి. గురుకుల పాఠశాల టైం టేబుల్ ను శాస్త్రీయంగా సవరించి, విద్యార్థులు, ఉపాధ్యాయులకు అనుకూలంగా మార్పు చేయాలి. 398 టీచర్లకు నోషనల్ ఇంక్రిమెంట్లు మంజూరు చేయాలి. ఎయిడెడ్ పాఠశాలలను ప్రభుత్వంలో విలీనం చేయాలి. ఎయిడెడ్ టీచర్లకు ప్రమోషన్లు కల్పించాలి. పాఠశాలలో విద్యార్థుల అవసరాలకు కాకుండా వ్యక్తుల అవసరాలకు ఇస్తున్న పైరవీ డెప్యుటేషన్లను రద్దు చేయాలి. అర్హత లేని, ఆరోపణలు ఉన్న డీఈవోలను తొలగించాలి. దీర్ఘకాలంగా ఒకే జిల్లాలో ఉన్న వారిని బదిలీ చేయాలి.
అన్ని జిల్లాలకు శానిటేషన్ గ్రాంట్లు విడుదల చేయాలి. కాంగ్రెస్ పార్టీ మేనిఫెస్టోలో హామీ మేరకు ప్రతి సంవత్సరం వేసవిలో ఉపాధ్యాయుల బదిలీలు, పదోన్నతులు నిర్వహించాలని డిమాండ్ చేశారు.
ఈ ధర్నా కార్యక్రమంలో యుఎస్పిసి నాయకులు జి. నాగమణి, పెరుమాళ్ళ వెంకటేశం, పి.వెంకులు, ఖురుషీద్ మియా, నర్రా శేఖర్ రెడ్డి, వడిత్య రాజు, జి. అరుణ, యాట మధుసూదన్ రెడ్డి, నలపరాజు వెంకన్న, మురలయ్య, పగిళ్ళ సైదులు, కొమర్రాజు సైదులు, గణేష్, ఈర అంజయ్య, ఆర్.లక్ష్మయ్య, జగతి, మూర్తి, వై.సైదులు, శ్రీదేవి, సంధ్య మరియు వివిధ మండల నాయకులు తదితరులు పాల్గొన్నారు.