Kumaraswamy Announces Relief for Vizag Victims: విశాఖ స్టీల్ ప్లాంట్లో జరిగిన ఘోర ప్రమాదంలో మృతి చెందిన కార్మికుల కుటుంబాలకు రూ.25 లక్షల చొప్పున పరిహారం, అర్హులకు ఉద్యోగాలు, పిల్లల విద్యా బాధ్యతలు భరిస్తామని కేంద్రం (Central Government) ప్రకటించింది.
విశాఖపట్నం స్టీల్ ప్లాంట్(Vizag Steel Plant)లో జరిగిన విషాదకర ప్రమాదంపై కేంద్ర ప్రభుత్వం వేగంగా స్పందించింది. స్టీల్ మెల్టింగ్ షాప్ విభాగంలో జరిగిన ఈ ఘటనలో పలువురు కార్మికులు ప్రాణాలు కోల్పోగా, మరికొందరు తీవ్రంగా గాయపడ్డారు. ఈ నేపథ్యంలో కేంద్ర ఉక్కు, భారీ పరిశ్రమల శాఖ మంత్రి హెచ్.డి. కుమారస్వామి (D.Kumara Swamy) బాధిత కుటుంబాలకు భారీ సహాయ ప్యాకేజీని ప్రకటించారు.
ప్రమాదంలో మరణించిన ప్రతి కార్మికుడి కుటుంబానికి రూ.25 లక్షల చొప్పున ఎక్స్గ్రేషియా అందజేయనున్నట్లు మంత్రి తెలిపారు. అలాగే తీవ్రంగా గాయపడిన వారికి రూ.10 లక్షల చొప్పున తక్షణ ఆర్థిక సహాయం అందించనున్నట్లు వెల్లడించారు. ఈ సాయం సంస్థ నుంచి లభించే ఇతర చట్టబద్ధ ప్రయోజనాలకు అదనంగా ఉంటుందని స్పష్టం చేశారు.
ప్రమాద తీవ్రతను స్వయంగా పరిశీలించేందుకు కుమారస్వామి విశాఖపట్నానికి చేరుకుని ఆసుపత్రిలో చికిత్స పొందుతున్న క్షతగాత్రులను పరామర్శించారు. బాధిత కుటుంబాలకు ప్రభుత్వం అన్ని విధాలుగా అండగా ఉంటుందని హామీ ఇచ్చారు. ఈ కష్ట సమయంలో కుటుంబాలకు అవసరమైన సహాయం అందించేందుకు కేంద్రం కట్టుబడి ఉందని పేర్కొన్నారు.
మృతుల కుటుంబాల్లో అర్హులైన ఒకరికి శాశ్వత ఉద్యోగం కల్పించనున్నట్లు మంత్రి ప్రకటించారు. అంతేకాకుండా వారి పిల్లల విద్యకు అయ్యే ఖర్చులను కూడా ప్లాంట్ యాజమాన్యమే భరిస్తుందని తెలిపారు. కుటుంబాల భవిష్యత్తు భద్రత దృష్ట్యా పలు సంక్షేమ చర్యలు చేపడుతున్నట్లు వెల్లడించారు.
ఇప్పటికే ప్లాంట్ క్వార్టర్స్లో నివసిస్తున్న బాధిత కుటుంబాలు అక్కడే కొనసాగేందుకు ప్రత్యేక అనుమతి ఇవ్వనున్నట్లు కేంద్రం తెలిపింది. మరణించిన ఉద్యోగి సాధారణ పదవీ విరమణ వయస్సు వచ్చేవరకు వారు అదే నివాసాల్లో ఉండేలా చర్యలు తీసుకుంటామని హామీ ఇచ్చింది.
ఇక ప్రమాదానికి గల కారణాలను పూర్తిస్థాయిలో తెలుసుకునేందుకు కేంద్ర ప్రభుత్వం ముగ్గురు సభ్యులతో కూడిన ఉన్నత స్థాయి నిపుణుల కమిటీని ఏర్పాటు చేసింది. బొకారో స్టీల్ ప్లాంట్ డైరెక్టర్ నేతృత్వంలో పనిచేసే ఈ కమిటీ ఘటనపై సమగ్ర విచారణ చేపట్టి నివేదిక సమర్పించనుంది. భవిష్యత్తులో ఇలాంటి ప్రమాదాలు పునరావృతం కాకుండా తీసుకోవాల్సిన భద్రతా చర్యలపై కూడా సిఫార్సులు చేయనుంది.
వేడి ఉక్కు ద్రవం కార్మికులపై పడటంతో జరిగిన ఈ ప్రమాదం దేశవ్యాప్తంగా ఆందోళన కలిగించింది. పరిశ్రమల్లో కార్మికుల భద్రతకు మరింత ప్రాధాన్యం ఇవ్వాల్సిన అవసరాన్ని ఈ ఘటన మరోసారి గుర్తు చేసింది.