Telangana Hikes Land Values: తెలంగాణలో భూముల మార్కెట్ విలువల సవరణకు రాష్ట్ర ప్రభుత్వం సిద్ధమైంది. జూన్ 5 నుంచి కొత్త రేట్లు అమల్లోకి రానుండగా, కొన్ని ప్రాంతాల్లో భూముల విలువలు 50 నుంచి 100 శాతం వరకు పెరగనున్నాయని రెవెన్యూ శాఖ మంత్రి పొంగులేటి శ్రీనివాస్ రెడ్డి (Ponguleti Srinivas Reddy) వెల్లడించారు. ఈ మార్పులతో ప్రభుత్వానికి అదనంగా సుమారు రూ.1,400 కోట్ల ఆదాయం వచ్చే అవకాశం ఉందని ఆయన తెలిపారు.
వాస్తవ మార్కెట్ పరిస్థితులను దృష్టిలో ఉంచుకుని భూముల ప్రభుత్వ విలువలను సవరించినట్లు మంత్రి పేర్కొన్నారు. ముఖ్యంగా శేరిలింగంపల్లి, రాజేంద్రనగర్, ఖాజాగూడ వంటి వేగంగా అభివృద్ధి చెందుతున్న ప్రాంతాల్లో విలువల పెంపు అధికంగా ఉండబోతుందని వివరించారు. అయితే భూముల విలువలు పెరిగినా, రిజిస్ట్రేషన్ ఛార్జీలను పెంచే ప్రతిపాదన ప్రస్తుతం లేదని స్పష్టం చేశారు.
ప్రజలకు కొత్త రేట్లపై స్పష్టమైన సమాచారం అందించేందుకు ప్రత్యేక హెల్ప్డెస్క్ ఏర్పాటు చేయనున్నట్లు తెలిపారు. అలాగే రెవెన్యూ వ్యవస్థలో పారదర్శకతను పెంచే చర్యల్లో భాగంగా సబ్-రిజిస్ట్రార్ల అధికారాలను పరిమితం చేసినట్లు వెల్లడించారు.
అసైన్డ్ భూముల అంశాన్ని ప్రస్తావించిన మంత్రి, గత ప్రభుత్వ కాలంలో వాటికి రిజిస్ట్రేషన్లు జరిగాయని ఆరోపించారు. ప్రస్తుతం తమ ప్రభుత్వం అలాంటి భూములను నిషేధిత జాబితాలో చేర్చి చర్యలు తీసుకున్నట్లు చెప్పారు.
ఇందిరమ్మ ఇళ్ల పథకం (Indiramma Housing Scheme) పై కూడా మంత్రి స్పందించారు. ఇప్పటివరకు ఈ పథకం కోసం రూ.7,000 కోట్ల నిధులు విడుదల చేసినట్లు తెలిపారు. కేంద్రం నుంచి నిధులు అందకపోయినా రాష్ట్ర ప్రభుత్వమే ఖర్చు భరించి ఇళ్ల నిర్మాణాన్ని పూర్తి చేస్తుందని ఆయన హామీ ఇచ్చారు.
