Vaibhav Breaks Sachin Record: భారత క్రికెట్లో మరో అరుదైన ఘట్టానికి తెరలేచింది. యువ సంచలనం వైభవ్ సూర్యవంశీ టీమిండియా సీనియర జట్టు (Senior Team) కు ఎంపికై అతి పిన్న వయసులో జాతీయ జట్టులో చోటు దక్కించుకున్న ఆటగాడిగా చరిత్ర సృష్టించాడు. 15 ఏళ్ల 71 రోజుల వయసులోనే భారత జెర్సీ ధరించే అవకాశం పొందిన ఈ యువ బ్యాటర్, దశాబ్దాలుగా కొనసాగుతున్న సచిన్ టెండూల్కర్ (Sachin Tendulkar)రికార్డును అధిగమించాడు.
ముంబైలో సమావేశమైన బీసీసీఐ సెలెక్షన్ కమిటీ (BCCI Selection Committee) ఐర్లాండ్, ఇంగ్లండ్లతో జరగనున్న టీ20 సిరీస్ల కోసం జట్టును ప్రకటించింది. ఈ జట్టులో వైభవ్కు అవకాశం కల్పించడం క్రికెట్ అభిమానుల్లో భారీ చర్చకు దారితీసింది. గతంలో సచిన్ టెండూల్కర్ 16 ఏళ్ల 205 రోజుల వయసులో భారత జట్టుకు ఎంపికై రికార్డు నెలకొల్పగా, ఇప్పుడు ఆ ఘనత వైభవ్ సూర్యవంశీ ఖాతాలో చేరింది.
వైభవ్ పేరు గత రెండు ఐపీఎల్ సీజన్లలోనే దేశవ్యాప్తంగా మార్మోగింది. 2025 సీజన్లో కేవలం 35 బంతుల్లోనే శతకం బాదిన అతడు ప్రపంచ క్రికెట్ దృష్టిని ఆకర్షించాడు. అదే జోరును 2026 సీజన్లోనూ కొనసాగిస్తూ బౌలర్లపై విరుచుకుపడ్డాడు. ఈ సీజన్లో 776 పరుగులు చేసి ఆరెంజ్ క్యాప్ సొంతం చేసుకోవడమే కాకుండా 237 స్ట్రైక్ రేట్తో 72 సిక్సర్లు బాది టోర్నీ చరిత్రలోనే అత్యంత విధ్వంసక బ్యాటర్లలో ఒకడిగా నిలిచాడు.
https://x.com/BCCI/status/2063164567484797250/photo/1
రాజస్థాన్ రాయల్స్ (Rajasthan Royals) తరఫున ఆడుతూ కీలక మ్యాచ్లలో ఒంటరి పోరాటం చేసిన వైభవ్, జట్టును ప్లేఆఫ్స్ వరకు తీసుకెళ్లడంలో కీలక పాత్ర పోషించాడు. ఈ సీజన్లో ఒక శతకం నమోదు చేసిన అతడు మరో రెండు సందర్భాల్లో 90లలో ఔటై సెంచరీలకు చేరువలో ఆగిపోయాడు. అయినప్పటికీ అతని నిలకడైన ప్రదర్శన సెలెక్టర్లను బాగా ఆకట్టుకుంది.
చీఫ్ సెలెక్టర్ అజిత్ అగార్కర్ కూడా వైభవ్ ప్రతిభపై ప్రశంసల వర్షం కురిపించాడు. చిన్న వయసులోనే ఒత్తిడిని తట్టుకుని పెద్ద పెద్ద బౌలర్లను ధైర్యంగా ఎదుర్కొనే తీరు ప్రత్యేకమని, అతని బ్యాటింగ్లో అసాధారణ ప్రతిభ కనిపిస్తోందని పేర్కొన్నాడు. భవిష్యత్తులో భారత క్రికెట్కు వైభవ్ కీలక ఆటగాడిగా మారే అవకాశాలు మెండుగా ఉన్నాయని అభిప్రాయపడ్డాడు.
బీహార్కు చెందిన ఈ యువ క్రికెటర్ అండర్-19 స్థాయి నుంచే తన ప్రతిభను నిరూపించుకున్నాడు. ఇప్పుడు సీనియర్ జట్టులో చోటు దక్కించుకోవడంతో అతనిపై అంచనాలు మరింత పెరిగాయి. ఐర్లాండ్, ఇంగ్లండ్ సిరీస్లలో అవకాశం లభిస్తే అంతర్జాతీయ స్థాయిలో కూడా తన సత్తా చాటాలని అభిమానులు ఆశిస్తున్నారు.
భారత క్రికెట్లో సచిన్, కోహ్లీ తరహాలో చిన్న వయసులోనే వెలుగులోకి వచ్చిన మరో ప్రతిభగా వైభవ్ సూర్యవంశీ పేరు ఇప్పటికే మార్మోగుతోంది. ఇప్పుడు అతడు అంతర్జాతీయ వేదికపై ఎలా రాణిస్తాడన్నదే అందరి ఆసక్తిగా మారింది.
