NEET Retest Fear Letter: నీట్ యూజీ పరీక్షకు సిద్ధమైన ఓ విద్యార్థిని రాసిన భావోద్వేగ లేఖ తాజాగా వెలుగులోకి రావడం చర్చనీయాంశంగా మారింది. పరీక్ష రద్దు కావడంతో తీవ్ర నిరాశకు గురైన ఆమె, మళ్లీ పరీక్ష రాసే ధైర్యం తనకు లేదంటూ లేఖలో పేర్కొన్నట్లు కుటుంబ సభ్యులు (Family Members)వెల్లడించారు.
మధ్యప్రదేశ్ (Madhya Pradesh)లోని మౌగంజ్ జిల్లాకు చెందిన ఆకాంక్ష చతుర్వేది వైద్య విద్యను అభ్యసించాలని లక్ష్యంగా పెట్టుకుని మహారాష్ట్రలోని నాగ్పూర్లో ఒక ప్రముఖ కోచింగ్ సంస్థలో నీట్ పరీక్షకు శిక్షణ పొందింది. పరీక్షకు బాగా సిద్ధమై, మంచి మార్కులు వస్తాయని ఆమె నమ్మకం పెట్టుకున్నట్లు కుటుంబ సభ్యులు తెలిపారు.
అయితే నీట్ పరీక్ష (Neet Exam)రద్దు కావడం, తిరిగి పరీక్ష నిర్వహించే అవకాశాలపై వచ్చిన వార్తలు ఆమెను తీవ్ర ఆందోళనకు గురిచేశాయి. ఈ పరిస్థితుల్లో గత నెల 20వ తేదీన ఆమె ఇంట్లో ఆత్మహత్యకు పాల్పడింది. ఈ ఘటన కుటుంబాన్ని తీవ్ర విషాదంలో ముంచేసింది.
ఘటన జరిగిన కొన్ని రోజుల తర్వాత, ఈ నెల 1న కుటుంబ సభ్యులు ఆమె పుస్తకాలను పరిశీలిస్తుండగా ఒక లేఖ కనిపించింది. అందులో తన మనసులోని బాధను ఆకాంక్ష స్పష్టంగా వ్యక్తం చేసినట్లు తెలుస్తోంది. ఆ లేఖను అనంతరం పోలీసులు స్వాధీనం చేసుకుని దర్యాప్తులో భాగంగా పరిశీలించారు.
Also Read:Former Maoist Leader Devji Secures Rank 349 in LAWCET: లాసెట్లో దేవ్జీ సత్తా.. 349వ ర్యాంకు
లేఖలో ఆకాంక్ష తన తల్లిదండ్రులకు క్షమాపణలు చెబుతూ, తాను పరీక్షను బాగా రాసినప్పటికీ మళ్లీ రాయాల్సి వస్తే అదే స్థాయి ఫలితాలు సాధించగలననే నమ్మకం లేదని పేర్కొంది. రీటెస్ట్ రాసే ధైర్యం తనకు చాలడం లేదని కూడా ఆమె రాసినట్లు సమాచారం.
పోలీసుల ప్రకారం, లేఖలోని వివరాలు ఆమె ఎదుర్కొన్న మానసిక ఒత్తిడిని స్పష్టంగా చూపిస్తున్నాయి. పోటీ పరీక్షల సమయంలో విద్యార్థులు ఎదుర్కొనే మానసిక ఒత్తిడి, ఆందోళనలపై ఈ ఘటన మరోసారి దృష్టి సారింపజేసింది.
విద్యార్థుల భవిష్యత్తుకు సంబంధించిన కీలక పరీక్షల విషయంలో స్పష్టత, మానసిక సహాయం, కుటుంబ సభ్యుల ప్రోత్సాహం ఎంత అవసరమో ఈ విషాద ఘటన గుర్తు చేస్తోందని విద్యావేత్తలు అభిప్రాయపడుతున్నారు.
